ශ්‍රී ලංකා කාන්තාවෝ පළමු පිම්ම පහසුවෙන් පනිති

විස්සයි 20 කාන්තා ලෝක කුසලාන ක්‍රිකට් තරගාවලියට සුදුසුකම් ලැබීමේ තරගාවලිය ආරම්භ කරමින් ඊයේ (25 වැනිදා) රාත්‍රී පැවති තරගයේදී ලකුණු 67ක පහසු ජයග්‍රහණයක් ලබා ගැනීමට ශ්‍රී ලංකා කාන්තා කණ්ඩායම සමත් වූයේය.

එම තරගයේ පළමුව පන්දුවට පහර දුන් ශ්‍රී ලංකා කණ්ඩායම පන්දු වාර 20 තුළදී කඩුලු 05ක් දැවී ලකුණු 122ක් රැස් කළ අතර තායිලන්ත කණ්ඩායමට සියලු දෙනා දැවී ලබාගත හැකි වූයේ ලකුණු 55ක් පමණි.

තායිලන්ත ඉනිම පන්දු වාර 16.2 ක් තුළ නිමා වූ අතර එහිදී ශ්‍රී ලංකා කණ්ඩායම වෙනුවෙන් විශිෂ්ට පන්දු යැවීමක නිරත වූ ඉනෝෂි ප්‍රියදර්ශනී ලකුණු 14 කට කඩුලු 3 ක් ලබා ගත් අතර තරගයේ දක්ෂතම ක්‍රීඩිකාව ලෙසද ඇය සම්මාන ලැබුවාය.