ජනපතිගේ සංකල්පයක් අනුව රණවිරුවන්ගේ පදිංචියට දී ඇති රජයේ ඉඩම්වලට කොන්දේසි විරහිත සින්නක්කර ඔප්පු
ජනාධිපති රනිල් වික්‍රමසිංහ මහතාගේ සංකල්පයකට අනුව රණවිරුවන්ගේ පදිංචියට දී ඇති රජයේ ඉඩම් සඳහා කොන්දේසි විරහිත සින්නක්කර ඔප්පු පිරිනැමීමේ වැඩසටහනක් ක්‍රියාත්මක කර තිබේ.
එමගින් මෙරට ස්වෛරීභාවය රැකගැනීම වෙනුවෙන් සිය ජීවිත කැප කළ, සක්‍රීය ක්‍රියාන්විතයේ රාජකාරි කළ ත්‍රිවිධ හමුදාවේ, ශ්‍රී ලංකා පොලිසියේ හා සිවිල් ආරක්ෂක බළකායේ දිවි පිදූ හා ආබාධිත වූ රණවිරුවන් හා ඔවුන්ගේ යැපෙන්නන් වෙනුවෙන් පදිංචිය සඳහා දී ඇති රජයේ ඉඩම් සඳහා කොන්දේසි විරහිතව හා ගාස්තු අය කිරීමකින් තොරව සින්නක්කර අයිතිය දීම මෙහිදී සිදු කෙරේ.
ජනාධිපති කාර්යාලයේ මෙහෙයවීමෙන් ක්‍රියාත්මක වන මේ වැඩසටහනේ අරමුණ මෙරට සෑම බිම් අඟලකම සියලු දෙනාට බියකින්, සැකයකින් තොරව යෑමට ඉඩ ප්‍රස්තාව උදා කර දීම වෙනුවෙන් සිය ජීවිතය කැප කළ විරෝදාර රණවිරුවන්ට මවුබිමේ බිම් කැබැල්ලක අයිතිය තහවුරු කර දීම වේ.
ජනාධිපතිවරයා විසින් අංක PS/CM/APL/267/2024 හා 2024-05-13 දිනැතිව රණවිරුවන්ගේ පදිංචිය සඳහා ලබා දී ඇති රජයේ ඉඩම් සඳහා පූර්ණ සහන ලබාදීම සඳහා ඉදිරිපත් කරන ලද අමාත්‍ය මණ්ඩල සන්දේශයට ලද අංක අමප/24/0898/601/058 හා 2024/05/23 දිනැති අමාත්‍ය මණ්ඩල තීරණය අනුව රණවිරුවන්ට පහත සඳහන් සහන හිමිව ඇත.
- විධිමත් තෝරාගැනීමේ ක්‍රමවේදයකින් සුදුසුකම් ලබා ඇතත් මෙතෙක් සංවර්ධනය කර ගැනීමට අපොහොසත් වූ සියලු රණවිරු කාණ්ඩ සඳහා රුපියල් 100ක නාම මාත්‍ර බදු මුදලක් යටතේ විශේෂ බද්දක් දීම,
- බදු ගත් ඉඩම් සංවර්ධනය සඳහා මුල්‍ය පහසුකම් සලසාගැනීම සඳහා පහසු වන පරිදි විශේෂ බදුකරයේ කොන්දේසි ලිහිල් කිරිම,
- සංවර්ධනය කරමින්/ සංවර්ධනය කර ඇති ඉඩම් සඳහා නොමිලේ නිදහස් දීමනා පත්‍ර දීම,
- මධ්‍යම පාන්තික ගැනුම් මිල කාණ්ඩය යටතේ සුදුසුකම් ලබා ඇති නේවාසික පදනමින් සංවර්ධනය කර ඇති ඉඩම් සඳහා නිදහස් දීමනා පත්‍ර ලබාදීම,
- කොන්දේසි සහිත විශේෂ දීමනා පත්‍ර ප්රතිපාදන ප්රකාරව පෘෂ්ඨාංකනය කිරීම හා කොන්දේසි ඉවත් කිරීම විධිමත් ලෙස ලියාපදිංචි කිරීම,
- මැනුම් නියෝගවලට අදාළ පිඹුරුපත් හා රේඛා චිත්‍ර ලබා ගැනීම මිනින්දෝරු දෙපාර්තමේන්තුව වෙත ගෙවිය යුතු මැනුම් ගාස්තුවලින් නිදහස් කිරීම.
යනාදිය ඊට ඇතුළත් වේ.
