උණුසුම වැඩිවෙන කොට ගෑණු ගුටිකනවා

දකුණු ආසියාවේ වායුගෝලය උණුසුම්වීමත් සමඟ අඩු ආදායම්ලාභී පවුල්වල කාන්තාවන් වැඩි ප්‍රමාණයක් ගෘහස්ථ හිංසනයට මුහුණ දෙන බව පුරෝකථනය කර ඇත. පසුගිය සතියේ නිකුත් කරන ලද අධ්‍යයනයකින් පෙන්නුම් කරන්නේ දකුණු ආසියාවේ උෂ්ණත්වය ඉහළ යාම සහ කාන්තාවන්ට එරෙහි ගෘහස්ථ හිංසනය වැඩිවීම අතර සම්බන්ධයක් අනාවරණය වන බවය. ඉන්දියාව ඒ අතර වඩාත් කැපී පෙනෙන වර්ධනයක් පෙන්නුම් කෙරේ.

ඇමරිකානු වෛද්‍ය සංගමයේ ජමා (JAMA) මනෝ චිකිත්සක සඟරාවේ (American Medical Association JAMA Psychiatry journal) ප්‍රකාශයට පත් කරන ලද මෙම අධ්‍යයනයෙන්, ඉන්දියාව, නේපාලය සහ පකිස්ථානය තුළ “පරිසර උෂ්ණත්වය සහ සමීප සහකරු ප්‍රචණ්ඩත්වය අතර සම්බන්ධය ගවේෂණය කරන ලදී.

පර්යේෂකයන් විසින් කායික, ලිංගික සහ චිත්තවේගීය හිංසනයන් ඇතුළත් සමීප සහකරු ප්‍රචණ්ඩත්වයේ ව්‍යාප්තිය අවබෝධ කරගැනීම සඳහා වයස අවුරුදු 15 සිට 49 දක්වා කාන්තාවන් සහ ගැහැණු ළමයින් 194,800 කට අධික සංඛ්‍යාවක් අධ්‍යයනය කළහ.

වාර්ෂික සාමාන්‍ය උෂ්ණත්වයේ සෙල්සියස් අංශක 1ක වැඩිවීමක් සමීප සහකරුගේ ප්‍රචණ්ඩත්වය 4.5%ක වැඩිවීමක් සමඟ සම්බන්ධ වී ඇති බව අධ්‍යයනයෙන් සොයාගෙන ඇත. සියලු‍ම ආදායම් කණ්ඩායම් අතර උෂ්ණත්වය වැඩිවීම හා සම්බන්ධ ප්‍රචණ්ඩත්වය ඉහළ යාම අතරින්, අඩු ආදායම්ලාභී සහ ග්‍රාමීය පවුල් අතර විශාලතම වැඩිවීම දක්නට ලැබුණි.
අධ්‍යයනය කරන ලද රටවල් තුන අතර උෂ්ණත්වය ඉහළ යාම හා සම්බන්ධ අපයෝජනයේ විශාලතම වැඩිවීම ඉන්දියාවෙන් අපේක්ෂා කෙරේ. ඉන්දියාවේ උෂ්ණත්වය සෙල්සියස් අංශක 1කින් ඉහළ යාම ශාරීරික හිංසනය 8%කින් සහ කාන්තාවන්ට එරෙහි ලිංගික හිංසනය 7.3%කින් ඉහළ යාමට සම්බන්ධ බව අධ්‍යයනයෙන් හෙළි වී තිබේ.

2090 පමණ වන විට, අසීමිත කාබන් විමෝචන තත්වයක් යටතේ, සමීප සහකරු ප්‍රචණ්ඩත්වයේ ඉහළම වැඩිවීම අපේක්ෂා කරන්නේ ඉන්දියාවය. ඒය 23.5% වන අතර, නේපාලය 14.8% සහ පකිස්ථානය 5.9% පමණ අගයක් පෙන්නුම් කරයි.
ඉන්දියාවේ, අධික තාප තරංග ඇතිවීම වාර්ෂික සිදුවීමක් බවට පත්වෙමින් තිබේ. මැයි මාසයේදී, උෂ්ණත්වය සෙල්සියස් අංශක 45 (ෆැරන්හයිට් අංශක 113) දක්වා ළඟා වෙමින්, රටේ විශාල ප්‍රදේශ පුරා දැඩි උෂ්ණත්වයත් පැතිර ගියේය.
දකුණු ආසියාව දේශගුණික විපර්යාසවලට වඩාත්ම අවදානමට ලක්විය හැකි කලාපයක් ලෙස සැලකේ. මෑත අධ්‍යයනයකින් හෙළි වූයේ දේශගුණික විපර්යාස දකුණු ආසියාවේ තාප තරංග 30 ගුණයකින් වැඩි වන බවයි.
දේශගුණික විපර්යාසවලට ප්‍රතිචාර දක්වන කලාපයේ සමාජ සුබසාධන යෝජනා ක්‍රමවලදී දැඩි උණුසුම සහ ස්ත්‍රී පුරුෂ සමාජභාවය මත පදනම් වූ ප්‍රචණ්ඩත්වය අතර සම්බන්ධය සලකා බැලිය යුතු බව විශේෂඥයෝ යෝජනා කරති.
දේශගුණික විපර්යාස නිසා ඇතිවන අර්බුද ගෘහස්ථ හිංසනය නරක අතට හැරෙන බව සිවිල් සමාජ සංවිධාන ද හඳුනාගෙන ඇත.

අධික උණුසුම දෛනික වැටුප් මෙන්ම සේවකයින්ගේ වැඩ කරන කාලයද අඩු කරන බව සොයාගෙන ඇති අතර එමඟින් ආදායම අඩු වන අතර පවුලේ සාමාජිකයින්ට නිවසේ වැඩි කාලයක් ගත කිරීමට බල කරයි. මෙය කාන්තාවන් සඳහා ගෘහාශ්‍රිත වැඩ ප්‍රමාණය වැඩි කරන අතර තමන්ට රැකියාවක් නොමැති පිරිමින් අතර ආතතිය හා කෝපය ඇති කරයි.
අවසාන වශයෙන් කෘෂිකාර්මික නිෂ්පාදනය සහ ශ්‍රම කාර්යක්ෂමතාව අඩුවීම සහ දැඩි ආයහපත් කාලගුණික තත්ත්වයන් නිසා සිදුවන හානිය හේතුවෙන් පිරිහෙන ජීවන පරිසරයන් නිසා ඇතිවන ආර්ථික ආතතිය ගෘහස්ථ ප්‍රචණ්ඩත්වය උග්‍ර කළ හැකි බව අධ්‍යයනයෙන් වැඩි දුරටත් පෙන්වා දෙයි. ඉන්දියාවේ අසල්වැසියන් ලෙස ලංකාවද මෙම කාරණා පිළිබද දැනුවත්ව කටයුතු කිරිමෙන් සිදු විය හැකි හානි අවම වන අතර නව ව්‍යාපාර අවස්තාද උදා කරගත හැක.

නිරෝෂන් පෙරේරා